文／李文煥，苗栗客家人，國中特教教師，現下戴苗栗（四縣腔）
二十年前，𠊎第一擺出國，就係同餔娘轉外家，因為異國婚姻有盡多手續愛辦，故所在該戴了歸隻月。馬來西亞个天時十分熱，毋過𠊎嗄試著當親切，因為在天西恁遠个國家，分𠊎尋著屋家个燒暖。丈人老係好性又有智慧个人，雖然厥右手因為麻痺症瘸忒，但係這手个症頭，全無影響佢在印刷廠个工作摎樂觀个人生觀。
丈人老從細在馬來西亞長大，曉講異多種語言，佢在渡𠊎逛街个時節，做得用馬來語、印度語、英語、廣府話、福建話同客家話摎人交談，佢流掠个語言能力分人十分佩服。佢乜係一個當好閱讀个人，逐日朝晨五點就準時䟘床看報紙、讀書，係一個盡有涵養个長輩。
佢輒輒講：「人生毋論甘苦，都係一場修行，孔竅就在態度。」丈人老同𠊎當有話講，從家鄉个文化爭差講到人生道理，厥个看法同智慧總係分𠊎欽服。該一隻月，𠊎兜甚至於比兩子爺還較有話講。
老古人言：「惜花連盆，惜子連孫 。」因為丈人老當縱妹仔，故所對𠊎這台灣婿朗乜特別惜。佢逐日渡𠊎去遶尞，滿哪仔去食無共族群个美食，連宵夜乜係十分豐沛。結果短短一隻月定定，吾个體重就肥了足足五公斤，該段在餔娘外家个日仔，正經係𠊎一生難忘个想念。一日半夜仔，丈人老湊𠊎去食宵夜，兩儕坐在吉隆坡个嘛嘛檔（註1），啉等冰涼个咖啡，食等當地个美食。
突然間佢扼等吾手目汁含等講：「𠊎摎寶貝妹仔交分你了，這生人你一定愛代爹地（註2）好好照顧佢。老古人講，兩人一般心，有錢堪買金；兩人兩般心，無錢堪買針。你兩儕愛互相扶持、忍讓，婚姻正會行到長長久久。」這段話深深刻在吾心肝頭，變成𠊎婚姻路項个明燈。
轉台灣進前一日，丈人老古怪个交分𠊎五盒名片。𠊎詳細看清楚頂項个紹介，名片頂項印等係吾名仔無毋著，毋過職業同學歷全合毋著現況。𠊎當狐疑問佢，這係仰般？佢笑微微个講：『這係𠊎特別為你設計个「未來名片」，面頂寫个係𠊎對你个期望，相信你一定做得達成。吾妹仔無因為若目珠毋好放棄，還係強強愛嫁分你，𠊎一片歡喜佢尋到真愛，一片又愁慮你兜个未來。故所，這張名片就係𠊎希望你愛做到个事情，爹地這一駁仔同你相處，發覺吾妹仔眼光不差，你係篤實又拘禮个後生人，相信你係肯煞猛打拚，總有一日定著會分𠊎放心。』
這張「未來名片」，對𠊎來講，早就毋係幾句印在紙上个文字定定，該係丈人老對𠊎个期望同信付。見擺𠊎看著這張名片，就會愐著佢對𠊎个鼓勵摎痛惜。過無幾多年，𠊎正經實現了名片頂个逐隻目標，變做有自信拿出這張名片个人。到今，丈人老雖然已經過身十過年，毋過佢个智慧還係深深影響等𠊎，𠊎同餔娘乜會久久想等𫣆俚个「爹地」。
（註1）嘛嘛檔：音maˇmag dangˋ；馬來語：Gerai Mamak）指由馬來西亞淡米爾裔（印度裔）穆斯林經營的飲食攤或餐館。在當地，這些穆斯林被俗稱為「嘛嘛」。傳統嘛嘛檔以路邊攤形式運作，現多轉型為固定式餐館或咖啡館。嘛嘛檔以價格實惠、24小時營業、全年無休聞名，有多元的本地和南印度風味食品，如拉茶（Teh Tarik）和印度煎餅（Roti Canai），並成為各族群社交聚會的重要場所。
（註2）爹地：音deˊdiˊ；「爹地」一詞源自英語的 「dadd」，是對父親的一種親暱稱呼。在馬來西亞的華人社群中，這種稱呼非常普遍，用於表達對父親的親切與愛意。特別是，在日常口語中，這兩個字的發音通常帶有上揚的語調，顯得更加輕快和親密。
華語
二十年前，我第一次出國，就是和妻子回娘家，因為跨國婚姻需要辦理許多手續，所以我們在那裡待了一整個月。馬來西亞的天氣非常炎熱，但我卻感到格外親切，因為在這個遙遠的國度，我找到了家的溫暖。岳父是一個性格很好又充滿智慧的人，雖然他的右手因小兒麻痺致殘，但這並不影響他在印刷廠的工作，也不減他樂觀的生活態度。
岳父從小在馬來西亞長大，懂得多種語言。在陪我逛街時，他能用馬來語、印度語、英語、粵語、閩南語和客家話與人交流，他流利的語言能力令人驚嘆。他也是一個非常熱愛閱讀的人，每天清晨五點準時起床看報紙、讀書，是一位非常有修養的長者。他常說：「人生無論甘苦，都是一場修行，關鍵在於態度。」岳父和我總是有聊不完的話題，從家鄉文化的差異談到人生哲理，他的見解與智慧總讓我深感欽佩。在那一個月裡，我們甚至於比兩父子更有話聊。
古人說：「惜花連盆，惜子連孫。」因為岳父非常疼愛女兒，所以對我這個台灣女婿也特別照顧。他每天帶我四處玩，吃遍各種不同族群的美食，就連宵夜都非常豐富。結果短短一個月，我的體重竟然足足胖了五公斤！這段在老婆娘家的日子，真的是我一生難忘的回憶。有一天深夜，岳父帶我去吃宵夜。
我們坐在吉隆坡的嘛嘛檔，喝著冰涼的咖啡，吃著當地的美食。他突然握住我的手，眼含淚光地說：「我把寶貝女兒交給你了，這一生你一定要替爹地好好照顧她。老古人說，兩人一條心，有錢能買金；兩人兩般心，沒錢能買針。你們夫妻要互相扶持、包容，婚姻才能長長久久。」這段話深深刻在我的心裡，成為我婚姻路上的明燈。
回台灣的前一天，岳父神秘的交給我五盒名片。我仔細看了看上面的內容，名片上印著我的名字沒錯，但職業和學歷卻完全不符合當時的現況。我疑惑地問他這是什麼，他微笑著說：『這是我特地為你設計的「未來名片」，上面寫的是我對你的期望，相信你一定能夠達成。我女兒沒有因為你的視力不好而放棄，堅持要嫁給你。我一方面為她找到真愛感到高興，一方面又擔心你們的未來。所以，這張名片就係我希望你要達成个事情，爹地這一陣子與你相處，發覺我的女兒眼光不差，你是堵實又知禮的年輕人，相信只要你努力打拚，總有一天一定會讓我放心。』
這張「未來名片」，對我來說，早就不是幾句印在紙上的文字而已，那是老丈人對我的期望和信任。每回我看到這張名片，就想起他對我的鼓勵和疼惜。過沒幾年，我真的實現了名片上的每個目標，成為有自信拿出這張名片的人。如今，岳父雖然已經過世十幾年了，但他的智慧還是深深影響著我，我和妻子也會一直想著我們的「爹地」。