文／邱鴻春，客語文薪傳師、桃園楊梅伯公岡客家人（海陸腔）
切開看著水傷多
話著店家恁孤盲
張張一包去問佢
一問上等蜜蘋果
摎平常共樣，逐朝晨打綠拿鐵做早朝食，毋多知仔有三年咧，其中當重要个主角之一「蘋果」，這日朝晨切仔開來，中央有明顯个水傷酪忒樣，摎進前下把仔發現个，比較起來有較嚴重，加上這日日時頭有六節課，驚怕食落去肚屎肚，毋知會肚屎痛無，若係當當愛上便所，該就死無命咧，會影響學生仔上課个權利！
就恁樣斯遽遽換隻看看，居然連切加3粒都共樣烏心肝，第5粒正無這種情形，這一包6粒就伸1粒定定，阿姆看著這情形，就摎4粒張起來，準備愛拿去分店家看，𠊎想想仔，還係順續摎最尾隻續切開來，吂知斷真共樣，阿姆就煞煞拿去分店家看。
轉來阿姆講，這係安到「蜜蘋果」，愛當冷个天時正會有个，係當甜當珍貴个。店頭家一開始無想著，還在佢攤位馬上切一隻試看仔，發現還係共樣，自家還毋甘願，就黏時試食講：盡甜無壞忒啊，當時還無想著係蜜蘋果，脣頭頭家娘正接嘴講，這係蜜蘋果。
人講：食一歲學一歲、食到老學到老，正經無半點淆漦，𠊎摎阿姆毋知就算咧，連賣水果个頭家就搞毋清楚！𠊎上網問古哥大神，正知這係一種現象，毋係一種特殊个品種，斷真係一隻無正常个問題，就像𠊎判斷疑狐个水傷、冷傷問題差毋多。
簡單講，該就係蘋果樹仔著著「水心症」，代謝無正常正結蜜个。因為在日夜溫差大个高山地區，為了禦寒正有个生存機制，本身為了保護種籽，愛摎澱粉快速轉換變成蜜，正毋會凍傷冷壞忒，所以會有「蜜腺」。像係梨山、福壽山个溫度變化大，就會有蜜蘋果个產生，無想著嗄因為水心症个問題，變成一隻靚靚个錯誤。
其實老古人言，早就有講：「人勤地獻寶，人懶地生草」，肯認真、肯打拚，自然會有好个收成好个結果。又有講：「上帝摎你關忒一扇門，同時會摎你開一扇窗」，簡單來講，就係「天無絕人之路」个意思。雖然道理盡簡單，但是有一部分个人，係堵著問題咧，往往就會戇霸忒，無辦法冷靜下來思考，愛仰般來解決問題，就失忒危機變轉機个機會！大家愛像做「膨風茶」恁樣个精神，賣到外國就係「東方美人茶」，係最成功个例仔，正經無膨風哦。
華語
切開看到水傷多
以為店家無良做
裝成一包去問他
一問上等蜜蘋果
和平常一樣，每天早上打綠拿鐵當早餐吃，不知不覺有三年了，其中很重要的主角之一「蘋果」，這天早上切開來，中間有明顯的水傷像要爛了，和之前有時候發現的，比較起來有較嚴重，加上今天白天有六節課，恐怕吃到肚子裡面，不知會肚子痛嗎，假如要一直跑廁所，那就完蛋了，會影響學生上課的權利！
於是就趕快換一個看看，居然連切3顆都一樣是黑心的，第5顆才沒有這種情形，這一包6顆就剩1顆而已，媽媽看到這情形，就把4顆裝起來，準備要拿去給店家看，我想了一下，還是順便把最後一個切開來，果然是一樣，媽媽就迅速拿去給店家看。
回來媽媽說，這是叫做「蜜蘋果」，要很冷的天氣才會有的，是很甜很珍貴的。店老闆一開始沒想到，還在他攤位馬上切一個試看看，發現也是一樣，自己還很不甘心，就馬上試吃說：很甜沒壞掉呀，當時還沒想到是蜜蘋果，旁邊的老闆娘才接著說，這是蜜蘋果。
人家說：活一歲學一歲、活到老學到老，一點都沒有錯，我和媽媽不知道就算了，連賣水果的老闆都搞不清楚！我上網問谷歌大神，才知道這是一種現象，不是一種特殊的品種，真的是一個不正常的問題，就和我判斷懷疑的水傷、冷傷問題差不多。
簡單說，那就是蘋果樹中了「水心症」，代謝不正常才結蜜的。因為在日夜溫差大的高山地區，為了禦寒才有的生存機制，本身為了保護種子，要把澱粉快速轉換變成蜜，才不會凍傷冷壞掉，所以會有「蜜腺」。像是梨山、福壽山的溫度變化大，就會有蜜蘋果的產生，沒想到卻因為水心症的問題，變成一個美麗的錯誤。
其實古有所云：「人勤地獻寶，人懶地長草」，肯認真、肯打拚，自然會有好的收成好的結果。又有說：「上帝為你關了一扇門，同時會幫你開一扇窗」，簡單來講，就是「天無絕人之路」的意思。雖然道理很簡單，但是有一部分的人，若是遇到問題，往往就會變傻了，沒辦法冷靜下來思考，要怎樣解決問題，就失去把危機變轉機的機會！大家要像做「膨風茶」這樣的精神，賣到外國就是「東方美人茶」，是最成功的例子，真的沒有膨風吹牛哦。