文／黃美貞，苗栗客家人，臺北市光復國小个先生， 這下戴臺北市（四縣腔）
在吾印象中，老灶下就有當多菣香（註1）个東西，一把晒燥个蒜仔、幾罐仔老蘿蔔乾、同現摘个七層插同芫荽仔，該全係阿姆煮菜該下，愛用著个寶貝，少一味就差多了！
屋下細人仔多，一喊好食飯，大家就像餓了三年樣仔，一碗淰淰錐錐个飯，挾兩垤爌肉攞兜仔味，兩三下仔定定，飯就划到淨淨，添加兩碗乜無罅喢。阿姆固定會去莊頭个豬砧（註2），割胛心同三層腈來煲爌肉，切好个肉先放在鑊頭炒香來，加兜冰糖、酒、豆油，用細細火仔煲，𠊎盡好看阿姆表演擐鑊耳仔拋肉，將面頂个肉調到底下，味緒同色目正會勻，毋會有兜仔上色、有兜仔白琢琢仔（註3）。落尾愛放一大扡蒜仔落去，手指公長个蒜仔鋪到面頂，再煲成十分鐘仔，就係香馞馞个爌肉，這蒜仔同爌肉盡合味。
熱天時節，竹筍湯係阿姆盡輒煮个湯，山項自家種个麻竹、綠竹削到薄薄仔，用大骨來炆，炆到竹筍軟絲入味，再放一撮仔七層插，係有細號个還較好，無放七層插个竹筍湯，就無味無緒。講乜奇怪，兩三皮葉仔做得換來一鑊噴香。寒天該下，種盡多蘿蔔仔，切大大垤，用肥湯來定定仔炆，特別係年節煠雞鴨个肥湯，上桌前放兜仔芫荽仔，遠遠就鼻得著該好味道。
老同學在自家老屋做便菜个生理，貼紅色泰魯个大灶，做出盡多傳統手路菜，尤其係鹹豬肉，係當多好朋友指定个家鄉味。用本地烏豬仔个三層腈，放米酒、粗鹽同胡椒這兜香料，共下鹵畀入味，再一料料仔包裝冷凍起來。愛食該下，正解凍落鑊，放一息仔油，兩片煎到赤赤，用斜刀切一片片仔，搵蒜仁醋，用糯米醋三股，糖一股，切幾粒仔蒜頭片落去，鹹豬肉合蒜仁醋，全毋會膩胲（註4），還特別承牙（註5）。同學講這係厥屋下个祖傳个配方，算起來有五十年了，係阿公留分佢个寶貝。
主角愛配角个幫襯，好菜愛菣香來𢯭手，愛做一品講究个料理，就愛先學會仰般菣香。
（註1）菣香（kien hiongˊ）：提香。
（註2）豬砧（zuˊdiamˊ）：原指賣肉者用的砧板，引申為賣豬肉的地方。
（註3）白琢琢仔（pag dog dog eˋ）：慘白的顏色。
（註4）膩胲（ne goiˊ）：因油膩而生的反胃感。
（註5）承牙（siinˇ ngaˇ）：食物有韌性，口感彈牙。
華語
在我的印象中，老廚房就有很多提香的東西，一把晒乾的蒜、幾罐老蘿蔔乾、同現摘的九層塔和香菜，那些都是媽媽煮菜時，要用到的寶貝，少一味就差多了！
家裡的孩子多，一聽到可以吃飯了，大家就像餓了三年的樣子，一碗滿滿像小山的飯，挾兩塊垤爌肉加一些湯汁，三兩下的功夫，飯就扒得乾乾淨淨，再添兩碗也沒問題。媽媽固定會去鎮上的豬肉攤，買胛心和三層肉來煮爌肉，切好的肉先放在鍋子炒香，加些冰糖、酒、醬油，用小小的火慢燉，我最喜歡看媽媽表演提鍋耳拋肉，將上面的肉調到底下，味道和顏色目才會勻稱，不會有些上色、有些白白的。最後要抓一大把蒜苗下去，大拇指長的蒜鋪到上面，再煮約十分鐘，就是香噴噴的爌肉，這蒜和爌肉的味道最搭。
夏天的時候，竹筍湯是媽媽最喜歡煮的湯，山上自己種的麻竹、綠竹削成薄薄的，用大骨來熬，熬到竹筍變軟入味，再放一撮九層塔，若有小號的較好，沒放九層塔的竹筍湯，就沒味道了。說也奇怪，兩三片葉子可以換來一鍋噴香。冬天的時候，種最多蘿蔔，切成大塊，用肥湯來慢慢的熬煮，特別是年節煮雞鴨的肥湯，上桌前放些香菜，遠遠就聞得到那好味道。。
老同學在自己的老屋做熟食的生意，貼紅色磁磚的大灶，做出最多傳統功夫菜，尤其是鹹豬肉，是很多好朋友指定的家鄉味。用本地黑豬的五花肉，放米酒、粗鹽和胡椒這些香料，一起醃製入味，再一條條的包裝冷凍起來。要吃的時候，才解凍下鍋，放一點油，兩面煎到焦香，用斜刀切成一片片的，沾蒜仁醋，用糯米醋三分，糖一分，切幾粒仔蒜頭片，鹹豬肉配蒜仁醋，完全不會反胃，還特別彈牙。同學說這是他家祖傳的配方，算起來有五十年了，是阿公留給他的寶貝。
主角愛配角个襯托，好菜要提香來幫忙，要做一品講究的料理，就要先學會怎麼提香。