文／鍾孝昇，國小教師、中壢客家人，這下戴中壢（四縣腔）
逐年八月底，就係學校迎接新生報到个時節，學校都會用各式各樣个方式，來分學生仔認識新環境，減少緊張个心情。在中壢个龍岡國小盡特別，學校肚有兩姊妹，佢兜毋使講笑科，毋使撮把戲，單淨乖乖企在該，就做得分細人仔試著當歡喜、當自在，定定仔來習慣學校个生活。係哪兩姊妹恁有辦法？原來就係个校犬兩姊妹——來玩、來瘋。
八月二十四，這日係龍岡國小一年生入學个日仔。細人仔揹等新書包，分阿公阿婆、爸爸媽媽渡來學校。有兜還吂行入門口，就噭到目汁濫泔，兩隻腳緊蹬地泥，想愛轉哩。乜有兜抿等嘴，毋敢噭出來，就敢怕分人笑。不過大部分个細人仔都有準備了，開容笑面摎門口个先生相借問，開始佢兜人生个新階段。
就在這滿哪仔都係噭眵聲、講笑聲該下，繫等客家花布頸圍仔个狗姊妹——來玩、來瘋，出場哩。佢倆儕無相無干，就在門口脣坐等爪癢，在該等學生仔摎佢兜共下翕相。
為著愛展現「客語生活學校」个特色，學校準備了當多客家風情个布置，還有寫著「𠊎係客家人」个牌仔，分家長、學生仔拿等來翕相，歸隻學校就係淰淰个客家味緒，實在盡生趣喔。
因爭一年生正入學，當多事情還毋慣，故所先生會在開學後無幾久，就渡等狗仔到教室，摎同學紹介佢兜，同時解說愛仰般摎狗仔相處，這既經成為龍岡國小个傳統了。雖然一隻班就愛用忒半點鐘个時間，兩姊妹時間一久，嗄變著懶𧊅𧊅仔个樣仔，毋過看著恁多細人暢摸摸个樣仔，兩姊妹還係會拿出精神，聽先生講佢兩儕个古。
來玩、來瘋係學校十過年前收養个流浪狗，逐年不管入學，抑係六年生畢業典禮，都做得看著佢兜个身影。佢兜毋單淨係細人仔在學校个伴，乜做得講係佢兜个學姊，生活當中，有麼个毋納意个事情，細人仔就會尋佢兜講心事，心情係好係壞，都做得摎佢兜來分享。
除忒摎同學共下讀書，來玩、來瘋還會𢯭手學校个事情。來玩會跈等先生去學校頭前个大路脣，做交通指揮个工作，分學生仔安全來上課。新冠肺炎當在該遰个時節，來瘋乜會在學校門口，看著學生仔係毋係有照規定來量體溫。兩姊妹因為恁樣認真做事，得著「全國優良校犬」个獎勵，舊年還去立法院接受表揚，當無簡單。
龍岡國小係一間盡惜動物个學校，認養盡多个流浪動物，從豬仔「來福」、兔仔「來發」，到雞仔「來雞」，都係先生、學生仔共下來照顧个。還記得該央時，學校就像一間「動物園」共樣，滿哪仔都聽仔著雞啼狗吠个聲。今這下，雖然「來福」、「來發」既經轉長山賣鴨蛋了，毋過學生仔應該還係記得佢兜得人惜个身影。
龍岡國小用客家文化，結合生命教育，辦理這擺个活動迎接新生報到，定著會分這兜細人仔試著當感心。期待這兜細人仔，未來在這認真學習，成為一個有愛心，有文化傳承精神个現代公民。
華語
每年八月底，就是學校迎接新生報到的時刻，學校會用各式各樣的方式，讓學生認識新環境，減輕緊張的情緒。位於中壢的龍岡國小非常特別，學校裡有一對姊妹，她們不用講笑話，也不用耍花招，只要乖乖站著，就能讓孩子們感到既開心又自在，漸漸適應學校的生活。是哪兩姊妹這麼有辦法？原來就是校犬姊妹——來玩和來瘋。
八月二十四號，這一天是龍岡國小一年級新生入學的日子，孩子們背著新書包，由爺爺奶奶、爸爸媽媽陪著到學校。有些孩子還沒走進校門，就哭得淚眼婆娑，雙腳一直蹬著地，想要回家。也有些孩子抿著嘴不敢哭出聲，害怕被人笑。但大部分的孩子都已經準備好了，面帶微笑，向門口的老師打招呼，開始他們人生的新階段。
就在這充滿哭聲與笑聲的時刻，戴著客家花布領巾的狗姊妹——來玩和來瘋，登場了。她們倆不慌不忙，就站在校門口悠閒地抓癢，等著學生們和她們一起拍照。
為了要展現「客語生活學校」的特色，學校準備了許多充滿客家風情的布置，還有寫著「我是客家人」的牌子，供家長和學生拿著拍照，整個學校瀰漫著濃濃的客家味道，真的非常有趣喔！
因為一年級新生剛入學，許多事情還不太習慣，所以老師會在開學不久後，就帶著狗狗到教室，向同學介紹她們，同時說明如何與狗狗相處，這已經成為龍岡國小的傳統了。雖然每到一個班級，就需要花半個小時左右，兩姊妹待久了，都會露出懶洋洋的樣子，但看到這麼多孩子高興地摸他們，他們還是會打起精神，靜靜聽老師講他們的故事。
來玩和來瘋是學校十多年前收養的流浪狗，每年不管是新生入學，還是六年級畢業典禮，都能看見他們的身影。他們不僅是孩子們在學校的夥伴，也可以說是孩子們的學姐。在日常生活中，不管有什麼不順心的事，孩子們都會找他們傾訴，無論心情好壞，都會和他們倆分享。
除了陪伴同學們讀書，來玩和來瘋還會幫忙處理學校的大小事。來玩會跟著老師到學校前面的馬路旁，協助指揮交通的工作，確保學生安全上學。在新冠肺炎流行期間，來瘋則會待在學校門口，檢查學生是否按規定量體溫。因為兩姊妹這麼認真負責，獲得了「全國優良校犬」的獎項，去年還到立法院接受表揚，真的非常不簡單。
龍岡國小是一所非常疼惜動物的學校，收養了許多流浪動物，從豬豬「來福」、兔子「來發」，到校雞「來雞」，都由老師和學生們一起照顧。還記得那時候，學校就像一間「動物園」，到處都能聽到雞鳴狗吠的聲音。如今，雖然「來福」和「來發」已經上天堂了，但學生們都應該還記得他們可愛的身影。
龍岡國小結合客家文化和生命教育，舉辦這次迎接新生報到的活動，一定會讓這些小朋友很感動。期待這些小朋友未來在這裡認真學習，成為一個有愛心、有文化傳承精神的現代公民。